KABABAIHAN sa Kalinangan at Kasaysayang Pilipino

Pinagsama-sama sa kasalukuyang pagpupunyaging ito ang mga batayang sanaysay gayundin ang mga bagong sanaysay ukol sa KABABAIHAN sa Kalinangan at Kasaysayang Pilipino. Tampok sa aklat na ito ang mga sinulat nina Dr. Zeus A. Salazar, Dr. Lilia Quindoza-Santiago, Dr. Judy M. Taguiwalo, Dr. Francis A. Gealogo, Ma. Reina Boro-Magbanua, Mary Jane Salazar-Tatel, Mary Dorothy dL. Jose, Atoy M. Navarro, Jerome A. Ong, Francisco M. Nunez Jr., Jely A. Galang, Janet S. Reguindin, at Adonis Ramy L. Elumbre. Sadyang pinagsama-sama rito ang mga batikan at bagong mananaliksik sa Araling Kababaihan -- babae man o lalaking mananaliksik -- upang salungguhitan ang pagiging kolektibo ng pag-aaral at pananaliksik hinggil sa kababaihan kaugnay ng paninindigang feminista at panunuring malay sa kasarian.Sa KABABAIHAN sa Kalinangan at Kasaysayang Pilipino, iginigiit bilang pangkahalatang layunin at tunguhin ang kolektibong pag-aaral at pananaliksik hindi lamang upang makapagbigay ng pangkahalatang larawan sa konteksto ng kababaihan sa kalinangan at kasaysayang Pilipino kundi upang makapagbigay rin ng mainam na tuntungan sa patuloy na kabayanihan at kilusang kababaihan sa Pilipinas